12 ліпеня ў бібліятэцы імя Ул. Караткевіча наведвальнікі школьнага лагера ДУА "Сярэдняя школа № 34 г.Віцебска" прынялі ўдзел у свяце "На ўсё лета ў краіну Чыталію". Да дзяцей завіталі ўсім вядомыя літаратурныя героі з казкі А. М. Талстога "Залаты ключык, або Прыгоды Бураціна".

Чарапаха Тарціла запрасіла дзяцей у краіну Чыталію. А Ліса Аліса ўгаворвала іх разам з ёй адправіцца на Поле Цудаў. Але ў яе нічога не атрымалася. Не дапамаглі ні маляўнічыя расказы пра прыгажосць Краіны Дурняў і бесклапотнае жыццё там, ні цудадзейныя словы, ні спробы прывесці на дапамогу адмоўных персанажаў з іншых казак. Дзеці адкрылі для сябе простую ісціну: сапраўдны скарб трэба шукаць не на Полі Цудаў, а на старонках добрых кніг. І таму яны разам з Чарапахай Тарцілай і Лісой Алісай, якая таксама многае зразумела, пры дапамозе чароўнага ключыка адправіліся ў сапраўды цудоўную краіну – Краіну Чыталію, дзе можна, не выходзячы з дому, апынуцца на іншым кантыненце, або у космасе, зазірнуць у далёкія стагоддзі, або ўбачыць будучыню.

Гэта краіна здольна змяніць кожнага, там можна выхаваць у сабе лепшыя якасці, набрацца розуму і мудрасці. Гэта думка лягла ў аснову тэатралізаванага прадстаўлення і ў ходзе яго стала зразумелай усім, хто прысутнічаў на свяце.