Централизованная библиотечная система города Витебска

   3 красавіка ў межах Тыдня дзіцячай і юнацкай кнігі і Тыдня музыкі супрацоўнікі бібліятэкі імя У. Караткевіча па просьбе адміністрацыі СШ №12 для вучняў пачатковых класаў арганізавалі тэатралізаванае прадстаўленне «Кніжкіны імяніны».

   Гаспадыня планеты Чыталіі запрасіла дзяцей адправіцца ў займальнае падарожжа па Кніжнай Галактыцы. Але ўсё сапсаваў камп'ютэрны вірус Кербер: ён захапіў у палон і аблытаў камп'ютэрным павуціннем саму Каралеву Кнігу. Каб яе выратаваць, трэба было выканаць шматлікія заданні, якія паказалі б, што дзеці не знаходзяцца ў камп'ютэрнай залежнасці, што яны любяць чытаць, займацца спортам, тварыць, гуляць на свежым паветры. Спрабавала разблытаць камп'ютэрнае павуцінне нават бабулька Шапакляк. Не ўсё атрымлівалася ў гэтага казачнага персанажа, але дзеці ёй ахвотна дапамаглі правільна адказаць на пытанне, зрабіць зарадку, напісаць верш. І калі Каралева Кніга была вызвалена, то і з адмоўнай гераіняй Эдуарда Успенскага таксама адбыліся метамарфозы, ёй захацелася стаць добрай, прыйшла любоў да кнігі і чытання. Фінальная песня «Той, хто любіць чытаць» прагучала ў харавым выкананні ўсіх удзельнікаў свята. Спектакль спадабаўся і дзецям, і настаўнікам, выклікаў шмат пазітыўных эмоцый.